1642 Terrier de Saint Rirand


Vénérable et discrète persone, Messire Benoist Vachier, curé de Sainct Riran, tant en son nom que pour et au nom de Benoist Baronnyer et Anthoine Clerc, ses nepveux de lad. paroisse de Sainct Riran, lequel de son gré confesse tenir partie de la censive et directe seigneurie de Jean de Montcorbier, escuier, seigneur de Champagny, Pierrefitte et Grosloup en son nom et comme père légitime, administrateur des personnes et biens d’Annet de Montcorbier, héritier testamentaire de Luc de Montcorbier, son oncle vivant seigneur desd. terres de Champagny, Pierrefitte absent, M(essi)re Jehan de la Gauste, son recepveur avecq le no(tai)re royal soubs(ig)né pour led. seigneur, présent,

Pour la moitié de la response de Jean Barnard, dict tachon, inscript au terrier dudict seigneur, signé de Berlicour ? Asscavoir,

Une terre............ et brosailles contenant pour le tout deux sisterées de terre ou environ scitué en lad. parois(se) de Sainct Riran appellé du Rollandin et en la justice dud. seigneur qui jouxte la terre et brosailles de Claude Tachon divisée d’avecq, faisant l’aultre moitié dudict article de matin et partie midy, la terre dud. Sieur ........... qui furent dudict Tachon de midy et soir et jouxte le chemin tendant de l’esglise de Sainct Riran à Sainct Nicolas de bise et partie soir, soubs le cens et servis par an d’un sols, six denier, un livron de soille et une mesure d’avoyne, mesure Pierrefitte,

Plus pour le premier article de la response de Blaise Rouchon dict Bianier audict terrier Berlicour ? un boys et vernay scitué au terroir des Abbatays et qui fut de la response de Guillaume Fayetier au terrier signé Goutard qui jouxte le pré dud S(ieu)r T...tier de matin et soir, la rivière des Abbatays tombant de Sainct Riran de midy, le chemin .... tendant de Sainct Riran et les boys commungs de bise, soubs le cens et servis par an d’un denier ................

Plus, pour partie d’un abénévis passé par Noble Nicolas de Montcorbier à Pasquet Baronnier, Nicolas Combegrand, Jean Rouchon dict Bianier en datte du vingtiesme febvrier mil cinq cens nonante cinq, receu Bravard, un boys scitué au thenement des Eschillier en la justice dud. seigneur, contenant vingt livrorées de terre ou environ, qui jouxte le boys de Gilbert Bianier de matin, le chemin tendant de la Croix du Sul ou de la plasse du Vernay à Sainct Nicollas de matin et partie midy, au(tre) boys dudict Bianier de soir, le boys de la terre d’Ambierle, une grande pierre ou y a plusieurs Croix entre deux de bise et le boys de Jean Desbenoists ancore de matin, soubs le cens et servis par an de cinq deniers, trois couppes et demye d’avoyne **

Plus pour au(tre) partie dudict abénévis, un au(tre) boys appellé Seignat raz et de Foyrie contenant quarante livrorées de terre ou environ quy jouxte le boys de Benoist Desbenoists de matin, le susdict chemin de midy, le boys Deshormières, le rial de Font Rie entre deux de soir, le boys de Montmorillon, une borne sur un petit toral ? entre quatre arbres entre deux de bise, soubs le cens et servis par an de neuf deniers, un raz trois couppes avoyne mesure susd.

Plus pour au(tre) partie dudict abénévis, un boys et pasquier joignant, scitué aud. thenement, contenant pour le tout quarante livrorées de terre ou environ quy jouxte les boys, pasquiers de Benoist Desbenoists de matin, ledict chemin de midy, la plasse du Fouet aussy de midy, le boys de Nicollas Desbenoists et les boys pasquiers dudict Bianier, le tout de soir et le rial de Pierre Croizée de bise, soubs le cens de neuf deniers d’avoyne, un raz trois couppes de la dicte mesure, desquels cens et servis led. Sr confessant promet payer chacun an perpetuellem(ent) et à chacun jour et feste Sainct Martin d’hivert aud. seigneur ou les siens ? avecq les droictss de laods et vends quand le cas y adviendra aux us et coustume du pays de Roannais, oblige...... aussi ........ tout et chacun ses biens et par expresse ypothèque les fonds sus confinés et les fruicts y provenant qu’il a soubmis à toute cour royalle et au(tre) ren(once) à tout droicts au contraire.

Faict et passé à Sainct Haon après midy le neuviesme jour d’aoust mil six cens quarante deux en présence de Mr Jean Martin, marchand dud. lieu et Jean Bargnier d’Ambierle tesm(oings) quy ont signé la minute avecq led. Sieur recognoissant

Extrait pris en ma minute pour servir aud. Sieur Vachier, ses nepveux et les leurs par moy soubsigné, Duvergier, notaire royal